نصايح على الطاير

عسلامة اليوم كالعادة مع مقال جديد أما حاجة خفافي و مش باش نقلقكم برشا ليوم باش نعطي 6 نصائح للمغروم جديد و اول مرة يعمل اكواريوم : 1.# قبل ما تحط حوتاتك المزيانات في اكواريومك لازم تتأكد انك باش تخلي الأكواريوم يوصل لتوازن متاعو وو وقت نحكيو على التوازن هنا نقصدو بانو الماء لازمو يركح لمدة باش يتنحى منو الجفال و باش البكتيرية المفيدة تركح روحها و باش cycle d'azote يركح ( الكلام هذا حكينا فيه قبل في مقال سابق و الي يحب يزيد يقرا ينجم يرجع لصفحة و يزيد يقرا ) 2.#زين اكواريمك قبل متحط الحوت باهي المرحلة هذي قبل متعملها لازم تثبت شنوا نوع الحوت الي ناوي تحطو في اكواريومك ثما حوتات يموتو على النبتات و يحتاجوهم باش يتخباو و باش يحسو رواحهم في المكان الطبيعي متاعهم و ثما حوتات متنجمش تحط معاهم نبتات خاطر يحبو مساحة مسيبة و الا بكل بساطة يفزدو اي نبتة تحطها 3.#متخافش كتشوف حوتاتك تتخبى دوب متحطها في الاكواريوم بالعكس هذي حاجة طبيعية تصور روحك حوتة ملول تتشد و يحطوك في متجر و مبعد تتحط في شكارة و يوصلوك مبعد لبلاصة جديدة فاكيد باش تخاف ملول و مبعد تتعود على البلاصة و تولي دور باريحية و الحوتات الي مربيتهم يوصلو يستانسو بيا و كي انا نتعدا بحذا الاكواريوم يتجمعو ماشي في بالهم باش نوكلهم و منحكيلكمش على الشعور محلاه 4.#الاضاءة في الاكواريوم لازمها تكون متناوبة يعني كيما في الطبيعة ثما ليل و ثما نهار هذا يخلي حوتاتك يرتاحو شويا و يمنع تكاثر الطحالب في الاكواريوم و زادة لازم تختار الاضاءة المناسبة للاكواريوم متاعك حسب كبرو و نوع الحوت و النبتات الي فيه و الموضوع هذا حكينا فيه البارح في مقال سابق 5.#تنضيف اكواريوم و تبديل الماء باهي الحكمة في الموضوع هذا انك متبدلش الماء كامل يقول قايل علاش ؟ بكل بساطة على خاطر اول نقطة حكينا عليها الي هي التوازن ثما توازن كامل تخلق عندك بين البكتيريا و النبتات و الماء و الحوت و الاخلال بالتوازن يمرض الحوتات و يخلقلك مشاكل مش محتاجلها اذا مالمستحسن كل اسبوعين تنقص 25 % مالماء و تبدلو بماء جديد و الماء مالمستحسن يكون بايت يعني مش طول مالسبالة تعبيه في سطل و تخليه يرتاح نهارين قبل ما تصبو في الاكواريوم و هكا تضمن اكواريومك ماه متجدد و مغير مشاكل و زادة مننساوش تنضيف الفيلتروات كل شهر تقريبا 6.#اعمل شويا بحث قبل متشري حوتات جدد و الا تنجم تسأل اعضاء فريقنا ثما برشا يطيحو في فخ انهم يحطو حوت ميعيشش مع بعضو و يولي الاكواريوم ساحة قتال و صراع و الخساير موش ساهلة جملا ان شاء الله يكون المقال عجبكم اذا كان عندكم اي اقتراح و الا سؤال تنجمو تراسلونا على الصفحة